Kapitujt

2 i Kronikave: 11. Veprimtaria e Roboamit

¹ Me të arritur në Jerusalem, Roboami e bashkoi mbarë shtëpinë e Judës e të Beniaminit: njëqind e tetëdhjetë mijë luftëtarë të zgjedhur për të luftuar kundër Izraelit e për t’ia kthyer vetes mbretërinë. ² Porse i erdhi fjala e Zotit Semejës, njeriut të Hyjit, e i tha: ³ “Fol me Roboamin birin e Salomonit, mbretin e Judës dhe me të gjithë Izraelin që është në Judë në Beniamin: ⁴ Kështu thotë Zoti: Ruaj se dilni e luftoni kundër vëllezërve tuaj! Secili le të kthehet në shtëpinë e vet sepse kështu ka ndodhur pse unë ashtu kam dashur”.

Këta, kur e dëgjuan fjalën e Zotit, u kthyen dhe nuk shkuan në luftë kundër Jeroboamit.

⁵ Roboami banoi në Jerusalem dhe i rindërtoi qytetet e fortifikuara të Judës. ⁶ E rindërtoi Betlehemin, Etamin, Tekuen, ⁷ Betsurin, Sokon, Odolamin, ⁸ Getin, Maresën, Zifin, ⁹ Aduramin, Lakisin e Azekën, ¹⁰ Saranë, Ajalonin dhe Hebronin që ishin qytete shumë të fortifikuara në Judë e në Beniamin. ¹¹ Pasi i rrethoi me mure, ua vuri udhëheqësit dhe shpuri në to nozulla drithërash, vaji e vere. ¹² Madje edhe në çdo qytet punoi armatore shqytash e heshtash dhe i forcoi me kujdesin më të madh.

Kështu u bë sundimtar i Judës dhe Beniaminit.

Priftërinjtë marrin anën e Roboamit

¹³ Priftërinjtë dhe levitët që ishin kudo në Izrael i lanë vendet e veta dhe erdhën te Roboami. ¹⁴ Edhe levitët i lëshuan kullotat dhe pronat e veta dhe kaluan në Judë e në Jerusalem për arsye se Jeroboami dhe pasardhësit e tij i përjashtuan ata prej shërbesës priftërore të Zotit. ¹⁵ Jeroboami themeloi priftërinj për lartësira, për djaj e për viça që ai vetë i kishte punuar. ¹⁶ Por shumë vetë prej të gjitha fiseve të Izraelit, të gjithë ata që me zemër e kërkonin Zotin, Hyjin e Izraelit, i ndoqën ata dhe erdhën në Jerusalem për t’i kushtuar fli Zotit, Hyjit të etërve të vet. ¹⁷ Kështu e forcuan mbretërinë e Judës dhe e përkrahën Roboamin, birin e Salomonit, për tre vjet; sepse e ndoqën udhën e Davidit e të Salomonit vetëm për tre vjet.

Familja e Roboamit

¹⁸ Roboami mori për grua Mahalatën, bijën e Jerimotit, të birit të Davidit dhe të Abihajlës, bijës së Eliabit, birit të Isait. ¹⁹ Prej saj i lindën djemtë: Jehusi, Somoria dhe Zoomi. ²⁰ Pas kësaj mori edhe Maakën, bijën e Absalomit, prej të cilës i lindën Ablai, Etaji, Zizai e Salomiti. ²¹ Por Roboami e deshi Maakën, bijën e Absalomit, më tepër se të gjitha gratë dhe konkubinat e veta, sepse kishte marrë tetëmbëdhjetë gra e gjashtëdhjetë konkubina. I lindën njëzet e tetë djem e gjashtëdhjetë vajza. ²² Roboami e vuri për kryetar të vëllezërve të vet Abinë, birin e Maakës, sepse atë mendonte ta bënte mbret. ²³ Dhe urtësisht i shpërndau djemtë e vet nëpër të gjitha krahinat e Judesë e të Beniaminit, në të gjitha qytetet e fortifikuara. I nozulloi me shumë ushqime dhe i martoi me shumë gra.

Kapitujt