Kapitujt

2 i Kronikave: 3. Salomoni e filloi ndërtimin e Shtëpisë së Zotit

¹ Atëherë Salomoni e filloi ndërtimin e Shtëpisë së Zotit në Jerusalem në malin Mori, që kishte qenë caktuar prej Davidit, babait të tij, por në atë vend që Davidi e kishte bërë gati, në lëmën e Ornan Jebuseut. ² Ndërtimin e filloi në muajin e dytë të vitit të katërt të mbretërimit të vet.

³ Dhe ja, masat që i caktoi Salomoni për ndërtimin e Shtëpisë së Hyjit: gjatësia gjashtëdhjetë kute, me kute të moçëm, kurse gjerësia njëzet kute. ⁴ Tremja, në ballë, ishte e gjatë sipas gjerësisë së Shtëpisë: njëzet kute. I lartë ishte njëqind e njëzet kute. Përbrenda e praroi me ar të kulluar. ⁵ Sallën e madhe e mbuloi me dërrasë bredhi dhe e veshi me pllaka ari të kulluar gjithkund. Në to gdhendi palma dhe i gërshetoi njëra me tjetrën me vargje. ⁶ Po ashtu truallin e Tempullit e shtroi me mermer shumë të çmueshëm dhe tejet të bukur.

⁷ Me arin që ishte prej Parvaimit e veshi sallën: d. t. th. muret, tratë, praqet dhe dyert. Në mure gdhendi kerubinë.

⁸ E punoi edhe sallën e Shenjtërores së shenjtëroreve: gjatësia sipas gjerësisë së Shtëpisë, njëzet kute dhe gjerësia po ashtu njëzet kute. E veshi me pllaka ari të kulluar: shpenzoi afër gjashtëqind talenta. ⁹ Për gozhda përdori pesëdhjetë sikla ari. Po ashtu edhe dhomat e sipërme i veshi me ar.

¹⁰ Në sallën e Shenjtërores së shenjtëroreve i punoi dy kerubinë: vepër skulptori, dhe i veshi me ar. ¹¹ Krahët e kerubinëve ishin të gjatë njëzet kute, kështu që njëri krah ishte i gjatë pesë kute dhe e prekte murin e sallës, kurse tjetri po ashtu pesë kute që e prekte krahun e tjetrit kerubin. ¹² Po ashtu edhe krahu i kerubinit tjetër ishte pesë kute dhe mbërrinte ta prekë murin e sallës, kurse krahu tjetër po ashtu pesë kute prekte krahun e kerubinit tjetër. ¹³ Kështu, krahët e të dy kerubinëve, ishin të shtrirë dhe kishin njëzet kute gjatësi.

¹⁴ E punoi edhe velin prej pëlhure vjollcë, të purpurt, pëlhure të kuqe e prej bezeje dhe qendisi në të kerubinë.

¹⁵ Në hyrje të Shtëpisë punoi edhe dy shtylla, që ishin tridhjetë e dy kute të larta, kurse krerat e tyre ishin pesë kutesh. ¹⁶ Gërshetoi keza dhe i vendosi në majë të shtyllave; punoi gjithashtu edhe njëqind shega që i vuri ndërmjet gërshetave. ¹⁷ Shtyllat i vendosi në ballë të Tempullit, njërën në të djathtën e tjetrën në të majtën. Atë që ishte në të djathtë e quajti Jakin, kurse atë në të majtë Booz.

Kapitujt