Kapitujt

2 i Mbretërve: 11. Historia e Ataljes

¹ Atalja, nëna e Okozisë, kur pa se i kishte vdekur i biri, u çua dhe i vrau të gjithë pasardhësit mbretërorë. ² Porse Josaba, bija e mbretit Joram, e motra e Okozisë, e mori Joasin, djalin e Okozisë, e vodhi prej djemve të mbretit që po i vrisnin, si dhe nanshoren e tij dhe i fshehu në dhomën e fjetjes prej syve të Ataljes, që të mos e vritnin. ³ Qëndroi i fshehur bashkë me nanshoren në Shtëpinë e Zotit për gjashtë vjet, gjatë kohës sa sundoi Atalja në vend.

⁴ Të shtatin vit Jojada i bashkoi urdhër‑ qindësit e harëve dhe të rojës trupore të mbretit, i futi te vetja në Shtëpinë e Zotit, lidhi me ta besëlidhje dhe i bëri të përbetoheshin në Shtëpinë e Zotit. Atëherë ua dëftoi të birin e mbretit ⁵ dhe u urdhëroi: “Ja ç’duhet të bëni: e treta juaj që hyn në shërbim të shtunën, le të ruajë te pallati mbretëror. ⁶ E dyta e tretë te dera Sur, kurse e treta e tretë, ajo që është te dera e sprasme e rojtarëve, le të bëjë roje të dera mbretërore. ⁷ Ndërsa dy njësitë e tjera që janë, ata që të shtunën dalin prej shërbimit, le të bëjnë roje në Shtëpinë e Zotit rreth mbretit. ⁸ Rrini rreth e rreth mbretit me armë në dorë. Kush të provojë të depërtojë rrethin tuaj në Tempull, le të vritet. Ngado që të shkojë mbreti, ju do të jeni me të.

⁹ Centurionët bënë ashtu si u kishte urdhëruar Jojada prift. Secili prej tyre mori njerëzit e vet, ata që të shtunën hynin në shërbim me ata që të shtunën dilnin nga shërbimi, dhe erdhën te Jojada prift. ¹⁰ Jojada ua dha centurionëve heshtat e shqytat e Davidit mbret që ishin në Shtëpinë e Zotit. ¹¹ Rojet, me armë në dorë, qëndruan prej këndit të djathtë të Tempullit e në këndin e majtë të Tempullit, prej lterit e Tempullit, në mënyrë që të rrethonin mbretin. ¹² E solli birin e mbretit, ia vuri kurorën e i dha Dëshminë. E bënë mbret dhe e shuguruan e, duke rrahur shuplakë, bërtitnin: “Rroftë mbreti”!

¹³ Atalja, kur e dëgjoi zhurmën e popullit, erdhi te populli në Tempullin e Zotit, ¹⁴ e pa mbretin: qëndronte në vendin e rëndomtë mbi palk e, përreth tij, prijësit e borizanët, kurse mbarë populli i vendit brohoriste e u binte trumbetave. Atalja i shqeu petkat e veta e bërtiti: “Tradhti, tradhti”!

¹⁵ Jojada prift u urdhëroi prijësve të ushtrisë e u tha: “Qiteni jashtë rrethit të Tempullit, e kushdo që të shkojë pas saj, le të pritet shpatë”. Sepse prifti kishte pasë dhënë urdhër: “Mos e vritni në Shtëpinë e Zotit”. ¹⁶ E kapën e, kur ajo arriti te pallati mbretëror rrugës së Hyrjes së Kuajve, e vranë.

¹⁷ Atëherë Jojada lidhi besëlidhje ndërmjet Zotit, mbretit e popullit që populli të jetë popull i Zotit. Edhe një besëlidhje ndërmjet mbretit e popullit. ¹⁸ Pastaj mbarë populli i vendit hyri në tempullin e Baalit dhe e rrënuan. I shpartalluan lterët e truporet e tija plotësisht. Po edhe Matanin, priftin e Baalit, e vranë përbri lterëve.

Jojada prift vuri përsëri rojat përreth Shtëpisë së Zotit.

¹⁹ Mori pastaj centurionët, harët, rojat dhe mbarë popullin e vendit dhe e përcollën mbretin prej Shtëpisë së Zotit dhe, rrugës së derës së Rojave, arritën në pallatin mbretëror. Mbreti u ul mbi fronin e mbretërve. ²⁰ Mbarë populli i vendit u gëzua dhe mbarë qyteti ra në fashë kur qe vrarë me shpatë Atalja.

Kapitujt