Kapitujt

Jozuehu: 18. Veprim kadastral për këto shtatë fise

¹ U bashkuan të gjithë bijtë e Izraelit në Silo dhe aty ngrehën Tendën e Takimit. E kishin pushtuar mbarë vendin. ² Por në mes të bijve të Izraelit mbetën shtatë fise që ende nuk e kishin marrë pronën e vet.

³ Atëherë Jozuehu u tha: “Deri kur do të kalbeni nga ngathtësia e nuk do të hyni ta merrni për pronë tokën që jua dha Zoti, Hyji i etërve tuaj? ⁴ Zgjidhni prej çdo fisi nga tre burra që t’i dërgoj ta përshkojnë tokën e ta përshkruajnë sipas numrit të secilit fis për ta ndarë. Pastaj le të ma sjellin ç’kanë shkruar. ⁵ Ndajeni tokën ndërmjet vetes në shtatë pjesë. Juda le të mbesë në tokën e vet në jug, kurse Shtëpia e Jozefit le të qëndrojë në tokën e vet në veri. ⁶ Tokën tjetër ta shkruani në shtatë pjesë. Ma sillni këtu tek unë, që në praninë e Zotit, Hyjit tonë, të qes short këtu për ju. ⁷ Levitët nuk do të kenë pjesë me ju, sepse priftëria e Zotit është prona e tyre. Kurse Gadi, Rubeni dhe gjysma e fisit të Manaseut tanimë i kanë marrë pronat e veta përtej Jordanit, në anën e lindjes, që ua pat dhënë Moisiu, shërbëtori i Zotit”.

⁸ Kur u ngritën njerëzit që të shkonin për ta përshkruar tokën, Jozuehu u urdhëroi: “Përshkojeni vendin dhe përshkruajeni e kthehuni tek unë, që këtu, në praninë e Zotit, në Silo, t’jua ndaj me short”. ⁹ Kështu, pra, ata shkuan dhe e përshkuan vendin qytet më qytet dhe e ndanë në shtatë pjesë duke e shënuar në regjistër. Atëherë u kthyen tek Jozuehu në zemërimië në Silo. ¹⁰ Jozuehu u hodhi short në praninë e Zotit në Silo dhe aty ua ndau tokën bijve të Izraelit sipas pjesëve të tyre.

Fisi i Beniaminit

¹¹ Shorti i ra fisit të Beniaminit sipas vëllazërive të tija: pjesa atyre u takoi ndërmjet bijve të Judës e bijve të Jozefit. ¹² Kufiri i tyre verior ishte prej Jordanit dhe vazhdonte gjatë krahut të veriut të Jerikut, ngjitej nga perëndimi në Malësi dhe përfundonte në shkretëtirën Betaven. ¹³ Prej andej shkonte drejt Luzës në jug ‑ kjo është Beteli ‑ zbret pastaj në Atarotadar, përbri malit që është në jug të Betoronit të Poshtëm. ¹⁴ Pastaj bënte lak e sillej drejt jugut nga mali që është përballë Betoronit dhe mbaronte në Kariatbaal që quhet edhe Kariatiarim, qytet i bijve të Judës: ky është krahu perëndimor.

¹⁵ Në krahun e mesditës, prej anës së Kariatiarimit, kufiri shkon në Gazim dhe arrin deri te burimi i ujërave Neftoa, ¹⁶ zbret pastaj në pjesën e fundme të malit që është përballë luginës Benenom në veri të luginës Rafaim. Ulet pastaj në luginën Enom, përbri krahut të Jebuseut në veri dhe mbërrin në burimin Rogel. ¹⁷ Kalonte në veri e mbërrinte në Ensemes /d. m. th. Burimi i Diellit/. Kalon deri në Galilot /këta janë rrathët/ që lartësohet drejt përpjetës Adomim, zbret pastaj tek Abenboeni /d. m. th. Guri Boen/ i birit të Rubenit, ¹⁸ e kalon nga veriu Betarabën dhe zbret në Arabë. ¹⁹ Pastaj kufiri kalon shpatit verior të Betaglës, dhe arrin në gjiun verior të Detit të Kripur, në grykën jugore të Jordanit. Ky është kufiri verior. ²⁰ Në anën e lindjes si kufi shërben Jordani.

Kjo është prona e bijve të Beniaminit sipas vëllazërive të tyre me kufijtë e saj përreth.

Qytetet e Beniaminit

²¹ Qytetet e fisit të Beniaminit ishin:

Jeriku, Betagla, Amekasisi, ²² Betaraba, Samaraimi, Beteli, ²³ Avimi, Fara, Ofra, ²⁴ Kafaremona, Ofniu, Gabaja: dymbëdhjetë qytete me fshatrat e tyre.

²⁵ Gabaoni, Rama, Beroti, ²⁶ Masfa, Kafira, Mosa, ²⁷ Recemi, Jarafeli, Tarala, ²⁸ Sela, Elefi, Jebusi ‑ që është Jerusalemi, Gabaati e Kariati: katërmbëdhjetë qytete me fshatrat e tyre.

Kjo është prona e bijve të Beniaminit sipas vëllazërive të tyre.

Kapitujt