Kapitujt

1 e Pjetrit: 5. Përgjegjësit e Grigjës së Hyjit

¹ Eprorëve, pra, që janë tek ju u jap vërejtje unë, epror edhe vetë bashkë me ta, dëshmitar i mundimeve të Krishtit dhe pjesëtar i Lavdisë që do të zbulohet: ² ruajeni grigjën e Hyjit që ju është lënë në kujdes, mbikëqyreni jo përdhuni, por vullnetarisht, si do Hyji; jo për hir të fitesës së ndytë, por me shpirt gatishmërie, ³ jo si zotërues mbi ata që ju janë besuar, por si shembull i grigjës. ⁴ E kur të shfaqet Kryebariu, do të merrni kurorën e lavdisë, që kurrë nuk vyshket.

⁵ Gjithashtu edhe ju të rinj, dëgjojini eprorët. Dhe të gjithë së bashku, në marrëdhënie me njëri-tjetrin, vishuni me përvujtëri, sepse: »Hyji u kundërshton madhështorëve, kurse të përvuajturve u jep hirin«.

⁶ Përkundrazi, pra, nën të pushtetshmen dorën e Hyjit, që në kohën e duhur t’iu lartësojë. ⁷ Lërini në dorën e tij të gjitha kujdeset tuaja, sepse Ai kujdeset për ju!

⁸ Jini të përkormë dhe rrini zgjuar! Armiku juaj, djalli, porsi luan ulëritës, endet këndej dhe andej duke kërkuar (kë) të përpijë. ⁹ Të fortë në fe kundërshtoni duke e ditur se po të njëjtat vuajtje i pësojnë vëllezërit tuaj në fe të shpërndarë nëpër botë.

¹⁰ Hyji, burimi i çdo hiri, i cili ju grishi në lumturinë e vet të amshur në Jezu Krishtin. Ai, pasi të vuani për pak kohë, do t’iu përsosë, do t’iu përforcojë, do t’iu japë fuqi dhe do t’iu bëjë të patrandshëm.

¹¹ Ai sundoftë në shekuj të shekujve. Amen!

¹² Po ju shkruaj shkurtimisht me ndihmën e Silvanit, të cilin e çmoj vëlla besnik, që t’iu përkujtoj dhe t’iu dëshmoj se ky është hiri i vërtetë i Hyjit. Qëndroni në të!

¹³ Ju bën të fala Kisha e të zgjedhurve që është në Babiloni, si edhe im bir, Marku.

¹⁴ Përshëndetni njëri-tjetrin me puthje vëllazërore!

Paqja me të gjithë ju që jeni në Krishtin!

Kapitujt