Kapitujt

1 e Pjetrit: 1. Shpresa jetësore

¹ Pjetri, apostulli i Jezu Krishtit, besimtarëve shtegtimtarë të shpërndarë nëpër Pont, Galaci, Kapadoki, Azi dhe Bitini, të zgjedhurve ² në saje të Provanisë së Hyjit Atë me shenjtërimin e Shpirtit Shenjt për të dëgjuar Jezu Krishtin dhe për të pasur pjesë në shpikjen e gjakut të tij: paçi hir dhe paqe me begati!

Shpresa jetësore

³ Qoftë bekuar Hyji, Ati i Zotit tonë Jezu Krishtit, i cili na rilindi me anë të mëshirës së vet të madhe në saje të ngjalljes prej të vdekurish të Jezu Krishtit, për shpresën jetësore, ⁴ për trashëgim të pashkatërrueshëm, të panjollë e të pavyshkshëm që e ruajti për ju në qiell; ⁵ për ju që jeni të ruajtur me fuqinë e Hyjit në saje të fesë për shëlbimin që është gati të zbulohet në kohën e fundit.

⁶ Këndej gëzoheni edhe pse, në qoftë se duhet, për pak kohë jeni të trishtuar për shkak të provave të ndryshme, ⁷ që feja juaj e sprovuar - shumë më e çmueshme se ari i shkatërrueshëm, që edhe ai sprovohet në zjarr - të fitojë lëvdatë, nder dhe lavdi në ditën e Zbulesës së Jezu Krishtit:

⁸ Atë e doni edhe pse nuk e patë, në Atë besoni edhe pse ende nuk e shihni; dhe galdoni me gëzim të patregueshëm dhe të lavdishëm, ⁹ që ia arritët qëllimit të fesë suaj: shëlbimit të shpirtit.

¹⁰ Për këtë shëlbim kanë vëzhguar dhe kanë shqyrtuar profetët, të cilët e paralajmëronin hirin e caktuar për ju. ¹¹ Shqyrtonin cila ishte koha dhe rrethanat, që shënonte Shpirti i Krishtit që ishte në ta, kur paralajmëronte mundimet që do t’i vuante Krishti dhe lavditë që do të vinin pas mundiveve. ¹² Atyre u qe zbuluar se, jo për ta, por për ju, u treguan ato që tani juve u ungjillëzohen prej predikatarëve tuaj me anë të Shpirtit Shenjt të dërguar prej qiellit, të cilat edhe engjëjt dëshirojnë t’i vëzhgojnë.

Thirrje për një jetë të shenjtë

¹³ Prandaj, shpirtërisht të gatshëm, rrini zgjuar dhe nguleni tërë shpresën tuaj në hirin që ju sjell Zbulesa e Jezu Krishtit. ¹⁴ Porsi fëmijë të dëgjueshëm, mos iu përshtatni dëshirave të mëparshme, kur ishit në padije, ¹⁵ por, siç është Shenjt Ai që ju ka thirrur, ashtu edhe ju jini të shenjtë në tërë jetën tuaj. ¹⁶ Sepse shkruan: »Të jeni të shenjtë sikurse edhe unë jam i shenjtë«.

¹⁷ Në qoftë, pra, se ju e quani atë Atë që pa krahmbajtje gjykon gjithkënd sipas veprave të tij, kaloni kohën e shtegtimit mbi tokë me frikën e Zotit!

¹⁸ Dijeni mirë: nuk jeni shpërblyer nga mënyra e zbrazët e jetës suaj të trashëguar nga etërit me ndonjë gjë të shkatërrueshëm - argjend apo ar, ¹⁹ por me gjak të paçmueshëm të Krishtit Qengjit të patëmetë e të panjollë.

²⁰ Ai njëmend ishte i caktuar që para krijimit të rruzullit, por u dëftua në këto kohët e fundit për arsye tuaj.

²¹ Në saje të tij ju besoni në Hyjin që e ngjalli nga të vdekurit dhe i dha lavdi, kështu që feja juaj dhe shpesa të jenë në Hyjin.

²² Pasi i pastruat shpirtrat tuaj duke e pasë dëgjuar të vërtetën për t’u dashur sinqerisht si vëllezër: doni njëri-tjetrin me gjithë shpirt dhe me dashuri të vërtetë, ²³ sepse u rilindët jo me farë që prishet, por që nuk merr mort kurrë: me fjalën e Hyjit të gjallë e të amshuar. ²⁴ Sepse: »Të gjithë njerëzit janë si bari, dhe tërë lavdia e tyre porsi lulja e fushës: Bari thahet e lulja vyshket, ²⁵ kurse fjala e Zotit mbetet në amshim«.

Tashti kjo fjalë është Ungjilli që ju qe shpallur.

Kapitujt