Kapitujt

Hebrenjve: 3. Jezusi është më i madh se Moisiu

¹ Këndej, o vëllezër të shenjtë, pjesëtarë të thirrjes qiellore, vëreni mirë të Dërguarin dhe Kryepriftin e fesë sonë - Jezusin. ² Ai është i besuari i Atij që e bëri Kryeprift siç ishte edhe Moisiu në tërë shtëpinë e Hyjit. ³ Por në krahasim me Moisiun, Jezusi është patjetër për një lavdi më të madhe, aq sa nderi i ndërtuesit e tejkalon nderin e vetë shtëpisë. ⁴ Dhe njëmend, çdo shtëpi ndërtohet prej dikujt; ndërsa ai që e ka ndërtuar gjithçka është Hyji. ⁵ Tashti edhe Moisiu qe i besuar në tërë shtëpinë e Hyjit, por vetëm si shërbëtor, për të qenë dëshmitar i të gjitha atyre që duheshin thënë prej Hyjit, ⁶ kurse Krishti është ai Bir mbi mbarë shtëpinë e Hyjit: shtëpia e tij jemi ne, në qoftë se e ruajmë sigurinë e plotë dhe mburrjen e shpresës.

Teprica e popullit të Hyjit

⁷ Prandaj, siç thotë Shpirti Shenjt:

»Sot, në qoftë se e dëgjoni zërin e tij, ⁸ mos jini zemërgurë si në ditën e Kryengritjes, si në ditën e vënies në provë në shkretëtirë, ⁹ ku më ngacmuan etërit tuaj dhe më vunë në provë edhe pse i panë veprat e mia ¹⁰ gjatë dyzet vjetëve. Prandaj m’u ndye ajo brezni dhe thashë: ‘Gjithmonë gënjehet zemra e tyre, e nuk i marrin vesh udhët e mia’. ¹¹ Kështu u përbetova në      zemërimin tim: »Kurrë s’do të hyjnë në pushimin tim!« 

¹² Kini kujdes, o vëllezër, që ndonjëri prej jush të mos e ketë zemrën e keqe, të pafe që të shkëputet nga Hyji i gjallë, ¹³ por nxiteni njëri-tjetrin dita-ditës deri sa të zgjasë kjo: »Sot«, që të mos »ngurohet« ndokush prej jush i ngashnyer prej mëkatit. ¹⁴ Sepse jemi bërë pjesëtarë të Krishtit - merret vesh - në qoftë se qëndrojmë të palëkundshëm në shpresë deri në fund ashtu si filluam. ¹⁵ Kur thuhet:

»Sot, në qoftë se e dëgjoni zërin e tij, mos jini zemërgurë si në ditën e Kryengritjes«.

¹⁶ kush janë, pra, ata që, pasi e dëgjuan, u çuan në kryengritje? A thua jo të gjithë ata që dolën nga Egjipti me anë të Moisiut? ¹⁷ Po kush thua, qenë ata që ‘ia mërzitën për dyzet vjet?’ Vallë a jo ata që mëkatuan, ‘kufomat e të cilëve ranë nëpër shkretëtirë?^{’ 18} Dhe cilëve ‘iu përbetua se nuk do të hynin në pushimin e tij’, në qoftë se jo atyre që nuk iu nënshtruan? ¹⁹ Ne e shohim se nuk mundën të hyjnë për shkak të mosbesimit.

Kapitujt