Dashuria dhe feja e Filemonit

1

¹ Pali, i burgosuri i Krishtit Jezus dhe vëlla Timoteu:

Filemonit, bashkëpunëtorit tonë të dashur, ² motrës Api, bashkëluftëtarit tonë Arhipit, si dhe Kishës që bashkohet në shtëpinë tënde:

³ Paçi hir dhe paqe prej Hyjit, Atit tonë, dhe prej Jezu Krishtit Zot!

Dashuria dhe feja e Filemonit

⁴ Gjithmonë e falënderoj Hyjin tim kurdo të kujtoj në lutjet e mia, ⁵ sepse po dëgjoj të flitet mirë për dashurinë tënde dhe për fenë që ke ndaj Zotit Jezus dhe ndaj të gjithë shenjtërve. ⁶ Pjesëmarrja jote në fe u bëftë e frytshme, në mënyrë që të njihet sa të mira të mëdha bëhen ndër ne për dashuri të Krishtit! ⁷ Dashuria jote, vërtet, ka qenë për mua gëzim i madh dhe ngushëllim, o vëlla, sepse i ke përforcuar zemrat e shenjtërve.

Pali porosit Onezimin

⁸ Prandaj, edhe pse e kam lirinë e plotë në Krishtin të të urdhëroj çka të duhet të bësh, ⁹ më fort po më pëlqen të të drejtohem me lutje në emër të dashurisë, kështu siç jam, unë Pali, plak dhe tani edhe i burgosuri i Krishtit Jezus. ¹⁰ Po të lutem për birin tim, të cilin e linda në pranga, për Onezimin, ¹¹ që dikur s’kishte farë vlere për ty, por që tani është shumë i vlefshëm për ty dhe për mua. ¹² Po ta dërgoj atë – loçkën e zemrës sime. ¹³ Desha ta ndal pranë meje që të më shërbejë në vendin tënd këtu në burg ku gjendem për shkak të Ungjillit, ¹⁴ por nuk desha të bëj asgjë pa pëlqimin tënd që, vepra e mirë të cilën do ta bësh, mos të të duket se e bëre përdhuni, por vullnetarisht. ¹⁵ Ndoshta pikërisht për këtë arsye qe ndarë prej teje për pak kohë që te ti të kthehej për gjithmonë, ¹⁶ jo më si skllav, por shumë më tepër se skllav, porsi vëlla i dashur, sidomos për mua dhe aq më tepër për ty, qoftë si njeri dhe qoftë si vëlla në Zotin.

¹⁷ Në qoftë se, pra, më mban për shok në fe, pranoje porsi mua! ¹⁸ Dhe në qoftë se të ka bërë ndonjë dëm ose të ka gjë borxh, më detyro mua për të gjitha.

¹⁹ Po nënshkruhem me dorën time – unë Pali: unë do të paguaj... që të mos të të përkujtoj se edhe ti ma ke një borxh – pikërisht vetveten! ²⁰ Po, o vëlla, ma bëj këtë nder në Zotin! Ma kërthndez zemrën time në Krishtin! ²¹ Duke qenë i bindur për dëgjesën tënde, të shkrova, plotësisht i mbushur mendjeje se do të bësh edhe më tepër se po të kërkoj. ²² Njëkohësisht ma bëj gati një banesë sepse, në saje të lutjeve tuaja, shpresoj se do t’ju dhurohem.

Përshëndejtet e fundit

²³ Të bën të fala Epafra, i burgosuri bashkë me mua në Krishtin Jezus, ²⁴ Marku, Aristarku, Dema, Luka, bashkëpunëtorët e mi.

²⁵ Hiri i Zotit tonë Jezu Krishtit qoftë me shpirtin tuaj!

Kapitujt

• 1