Kapitujt

2 e Timoteut: 4. Porositë personale

¹ Po të përbej para Hyjit dhe para Krishtit Jezus, i cili do të gjykojë të gjallët e të vdekurit: pash Ardhjen e tij dhe Mbretërinë e tij: ² predikoje Fjalën, nxit në rast të volitshëm dhe në rast të pavolitshëm, këshillo, qorto, urdhëro me plot duresë dhe mësim! ³ Sepse do të vijë koha, kur njerëzit nuk do ta durojnë mësimin e shëndoshë, por, sipas ëndjeve të veta, do të bashkojnë rreth vetes mësues për të kënaqur veshin; ⁴ do t’i largojnë veshët prej së vërtetës dhe do t’i sjellin drejt përrallave. ⁵ Ti veç rri zgjuar në çdo gjë me kujdes, duroji të vështirat, kryeje mirë detyrën e ungjilltarit, kryeje plotësisht shërbesën tënde!

⁶ Sa për mua – gjaku im tashmë po derdhet në nder të Hyjit dhe koha të nisem për atë jetë arriti! ⁷ Luftën e mirë e luftova, vrapimin e kreva, fenë e ruajta. ⁸ Që tani më pret gati kurora e drejtësisë, që atë Ditë do të ma japë Zoti, Gjykatësi i drejtë; dhe jo vetëm mua, por të gjithë atyre që do ta presin me dashuri Ardhjen e tij.

Porositë personale

⁹ Nisu dhe eja sa më parë te unë, ¹⁰ sepse Dema, për dashuri të këtij shekulli, më la vetëm. Ai shkoi në Selanik, Kreshenci në Galaci, Titi në Dalmaci. ¹¹ Me mua është vetëm Luka. Markun merre dhe bjere me vete sepse e kam të dobishëm për shërbesë. ¹² Tihikun e dërgova për Efes.

¹³ Kur të vish, ma bjer tabaren që e lashë te Karpi në Troadë. Po ashtu edhe librat, sidomos pergamenat.

¹⁴ Aleksandri farkëtar më bëri shumë të këqija: Zoti do t’ia kthejë sipas veprave të tij. ¹⁵ Ruaju edhe ti prej tij, sepse ka qenë kundërshtar i madh i predikimeve tona.

¹⁶ Në mbrojen time të parën në gjyq askush nuk qe me mua: të gjithë më lanë në baltë: mos iu marrtë askujt për të keq! ¹⁷ Por Zoti qe me mua. Ai më dha fuqi që predikimi i Ungjillit të kumtohej plotësisht dhe ta dëgjonin të gjithë paganët. Hyji më shpëtoi nga goja e luanëve. ¹⁸ Vetë Zoti do të më shpëtojë nga çdo vepër e keqe dhe do të më shëlbojë për Mbretërinë e vet qiellore. Lavdi Atij në shekuj të shekujve! Amen!

Përshëndetjet e fundit

¹⁹ Bëju të fala Priskës dhe Akullit edhe familjes së Oneziforit.

²⁰ Erasti zuri vend në Korint. Trofimin e lashë të sëmurë në Milet.

²¹ Nesu dhe eja para dimrit!

Të përshëndesin Eubuli, Pudenci, Lini, Klaudja dhe të gjithë vëllezërit.

²² Zoti qoftë me shpirtin tënd!

Hiri qoftë me ju!

Kapitujt