Kapitujt

2 e Selanikasve: 3. Lutuni për ne

¹ Pastaj, o vëllezër, lutuni për ne që fjala e Zotit të vrapojë e të nderohet si ndër ju ² dhe që të shpëtojmë prej njerëzve të mbrapshtë e të këqij; sepse të gjithë nuk kanë fe!

³ Por Hyji është besnik dhe Ai do t’ju forcojë dhe do t’ju ruajë nga i Keqi.

⁴ Ne jemi plotësisht të bindur në Zotin se ju i zbatoni porositë tona dhe se do t’i zbatoni. ⁵ Vetë Zoti i drejtoftë zemrat tuaja në dashurinë e Hyjit dhe në qëndrueshmërinë e Krishtit!

Qortim lidhur me papunësinë

⁶ Juve, o vëllezër, ju urdhërojmë në Emër të Jezu Krishtit Zot, të rrini larg nga çdo vëlla që jeton në përtaci, jo sipas porosisë që morët prej nesh. ⁷ Sepse ju vetë mirë e dini se e keni për detyrë ta ndiqni shembullin tonë. Ne, kur jetuam ndër ju, nuk jetuam në përtaci: ⁸ bukën askujt nuk ia lypëm dhuratë, por punuam natë e ditë me mund e lodhje që të mos i bëheshim ndokujt prej jush barrë. ⁹ Jo sikur të mos kishim pasur të drejtë në ndihmën tuaj, por vetveten ju dhamë për shembull ‑ që të na përngjani. ¹⁰ Këndej, kur ishim ndër ju, ju patëm dhënë këtë urdhër: “Kush nuk do të punojë, as mos të hajë!” ¹¹ Tani po dëgjojmë se disa ndër ju jetojnë në papunësi: nuk punojnë asgjë dhe e humbin kot kohën. ¹² Të tillëve u urdhërojmë dhe u bëjmë be Zotin Jezu Krisht, le të punojnë në paqe dhe le ta hanë bukën që e fitojnë vetë!

¹³ Dhe ju, o vëllezër, mos u mërzitni duke bërë vepra të mira! ¹⁴ Në qoftë se ndokush nuk i bindet fjalës sonë në këtë letër, shënojeni dhe mos u shoqëroni me të që të turpërohet, ¹⁵ por mos e mbani për armik dhe këshillojeni si vëlla.

Bekimi

¹⁶ Dhe vetë Zoti që jep paqen, gjithmonë dhe në çdo mënyrë jua dhëntë paqen. Zoti qoftë me ju të gjithë!

¹⁷ Përshëndetje me dorën time ‑ të Palit.

Kështu shënoj çdo letër: unë kështu shkruaj.

¹⁸ Hiri i Zotit tonë Jezu Krishtit qoftë me ju të gjithë!

Kapitujt