Kapitujt

Efesianëve: 1. Bekimi shpirtëror në Krishtin

¹ Pali, apostulli i Jezu Krishtit për vullnet të Hyjit:

shenjtërve që janë (në Efes), besimtarëve në Jezu Krishtin.

² Paçi hir e paqe prej Hyjit, Atit tonë, dhe prej Jezu Krishtit Zot!

Bekimi shpirtëror në Krishtin        

³ Qoftë bekuar Hyji.

Ati i Zotit tonë Jezu Krishtit,

i cili na bekoi

me çdo bekim shpirtëror

në qiell

në Krishtin.

⁴ Në Të na zgjodhi

para krijimit të botës

që të jemi të shenjtë e të papërlyer para Tij

në dashuri.

⁵ Ai na parashënoi për vete

të jemi bij në shpirt

në saje të Jezu Krishtit

me pëlqimin e vullnetit të vet

⁶ për nder të lavdisë së hirit të tij

me të cilin na pajisi me anë të të Dashurit:

⁷ në Të, në saje të gjakut të tij,

e fituam shpërblimin;

në Të na u falën fajet

me anë të begatisë së hirit të tij,

⁸ të cilin Hyji e ndikoi në ne

bashkë me çdo urti e kuptim.

⁹ Ai na vuri në dijeni mbi misterin e vullnetit të vet ‑ synim që lirisht kishte vendosur që më parë ta kryente në Të ‑

¹⁰ kur të plotësohej koha:

d. m. th. të vërë çdo gjë nën kryesinë e Krishtit,

të gjitha qeniet që janë

në qiell e në tokë.

¹¹ Në të edhe ne u bëmë trashëgimtarë

‑ të paracaktuar

me vendim të Atij

që vepron gjithçka sipas pëlqimit të vullnetit të vet ‑

¹² të jemi në nder të lavdisë së tij

‑ne që që më parë e vumë shpresën në Krishtin.

¹³ Po në Të edhe ju

që e dëgjuat fjalën e së vërtetës

‑ Ungjillin e shëlbimit tuaj ‑

pasi besuat në Të,

u vulosët me Shpirtin Shenjt ‑ të Premtuarin ‑

¹⁴ që është pengu i trashëgimit tonë:

për shpërblimin e plotë të atyre

që u bënë pronë e Hyjit ‑

në nder të Lavdisë së tij.

Lutja e Palit

¹⁵ Prandaj edhe vetë, që kur dëgjova për fenë tuaj në Jezusin Zot dhe për dashurinë kundrejt të gjithë shenjtërve, ¹⁶ nuk pushoj së falënderuari për ju e së kujtuari ju në lutjet e mia, ¹⁷ që Hyji i Zotit tonë Jezu Krishtit, Ati i Lavdisë, t’ju japë Shpirtin e dijes e të zbulesës për ta njohur Atë; ¹⁸ t’ju japë syve të zemrës (tuaj) dritë, që të mund ta kuptoni shpresën e madhe që jep thirrja e tij, begatinë e pakufishme të trashëgimit të tij ndër shenjtër, ¹⁹ dhe madhërinë e pamasë të fuqisë së tij kundrejt nesh që besojmë, të matur sipas veprimtarisë së pushtetit dhe forcës së Tij,

²⁰ të cilën e tregoi me vepër në Krishtin

duke e ngjallur nga të vdekurit

dhe duke e vendosur në të djathtën e vet në qiell,

²¹ mbi çdo Principatë, Pushtet,

Fuqi, Zotërim

dhe mbi çdo emër që mund të përmendet

jo vetëm në këtë, por edhe në botën e ardhshme.

²² Dhe çdo gjë vuri nën këmbët e tij

e Atë e vendosi mbi çdo gjë

‑ për Krye të Kishës,

²³ e cila është Trupi i tij,

plotësimi i Atij që plotëson gjithçka në të gjithë.

Kapitujt