Kapitujt

2 e Korintasve: 6. Tempulli i Hyjit të gjallë

¹ Pasi jemi bashkëpunëtorë me Të, ne ju nxisim: mos e lini pa fryt hirin që morët prej Hyjit! ² Ai thotë:

‘Në kohë të volitshme të vështrova,

në ditë të shpëtimit të ndihmova.’

Ja, pra, tani koha e volitshme, ja, pra, dita e shpëtimit!

³ Ne nuk i japim askujt shkandull në mënyrë që të mos poshtërohet shërbesa jonë. ⁴ Përkundrazi, në çdo gjë e dëftojmë veten si mbarështues të Hyjit

me qëndresë të madhe

në vështirësi,

në nevoja,

në ngushtica,

⁵ në të rrahura,

në burgje,

në kryengritje,

në mund,

në të ndenjura zgjuar,

në agjërime,

⁶ në pastërti,

në dije,

me zemërgjerësi,

me mirësi,

në Shpirtin Shenjt,

në dashuri të çiltër,

⁷ me fjalë të vërtetë,

me fuqi të Hyjit,

duke sulmuar e duke u mbrojtur

vetëm me armë të drejtësisë,

⁸ me lavdi e me çnderim,

me zë të mirë e me zë të keq,

të mbajtur për gënjeshtarë e, pra, të vërtetë,

⁹ si të panjohur e, pra, të njohur mirë,

si ata që janë duke vdekur e, pra, jetojmë,

porsi të ndëshkuar, por jo të vrarë,

¹⁰ porsi të trishtuar e përkundrazi gjithmonë të gëzuar,

porsi skamnorë e pra, bëjmë të pasur shumë,

si ata që nuk kanë kurrgjë e kemi gjithçka!

¹¹ Goja jonë, o korintianë, nuk ju fshehu asgjë, zemra jonë për ju është plotësisht e hapur. ¹² Keni, pra, mjaft vend në zemrën tonë, por zemra juaj është e ngushtë. ¹³ Ma shpërbleni edhe ju ‑ flas porsi me fëmijët e mi ‑ hapeni edhe ju plotësisht zemrën tuaj!

Tempulli i Hyjit të gjallë

¹⁴ Mos u zini në zgjedhë me të pafetë! Çfarë të mire të përbashkët mund të ketë drejtësia me mbrapshtinë? Ose, çka ka të përbashkët drita me terrin? ¹⁵ Çfarë përkimi ka Krishti me Beliarin? Ç’pjesë ka besimtari me të pafenë? ¹⁶ E ç’marrëveshje mund të ketë Tempulli i Hyjit me idhuj? Sepse, ne jemi Tempulli i Hyjit të gjallë, siç tha vetë Hyji:

‘Do të banoj në ta e ndër ta do të ec,

do të jem Hyji i tyre

dhe ata populli im.

¹⁷ Prandaj, dilni prej rrethit të tyre

dhe rrini në vete, thotë Zoti,

e mos prekni asgjë të papastër,

dhe unë do t’ju pranoj.

¹⁸ Do të jem Ati juaj

e ju do të jeni bijtë e mi dhe bijat,

thotë Hyji, i Gjithëpushtetshmi.’

Kapitujt