Kapitujt

1 e Korintasve: 12. Dhuratat e Shpirtit Shenjt

¹ Po edhe për sa u përket dhuratave të Shpirtit Shenjt nuk dua, o vëllezër, të mos jeni të njoftuar mirë. ²

Ju e dini se, kur ishit paganë, të gënjyer, tërhiqeshit pas idhujve të pagojë. ³ Prandaj, po ju them: askush që flet nën ndikimin e Shpirtit të Hyjit, nuk thotë: “Qoftë mallkuar Jezusi!”, por edhe askush nuk mund të thotë as: “Jezusi është Zot!”, veçse nën veprimin e Shpirtit Shenjt.

⁴ Dhuratat janë të ndryshme, por Shpirti Shenjt është i njëjtë ‑

⁵ edhe shërbesat në përhapje të Ungjillit janë të ndryshme, por Zoti është i njëjtë ‑

⁶ po edhe mënyrat e veprimit janë të ndryshme, por Hyji është i njëjtë ‑

Ai bën gjithçka në të gjithë.

⁷ Secili merr dhuratë të veçantë të zbulesës së Shpirtit Shenjt për të mirën e përbashkët.

⁸ Dhe njëmend, Shpirti Shenjt i jep njërit fjalën e urtisë, kurse i njëjti Shpirt Shenjt një tjetri i jep fjalën e dijes; ⁹ po i njëjti Shpirt Shenjt një tjetri i jep fenë, një tjetri prapë, i njëjti Shpirt Shenjt, i jep dhuratën e shërimeve;

¹⁰ një tjetri pushtetin për të bërë mrekulli,

një tjetri profecinë,

një tjetri aftësinë të dallojë shpirtrat,

një tjetri zotësinë e gjuhëve të ndryshme,

një tjetri shtjellimin e gjuhëve.

¹¹ E të gjitha këto i bën një i vetmi Shpirt Shenjt duke i ndarë veçanërisht secilit ashtu si Ai do.

Një trup i vetëm e shumë gjymtyrë

¹² Dhe njëmend, sikurse një trup i vetëm ka shumë gjymtyrë e të gjitha gjymtyrët e trupit, edhe pse shumë ‑ nuk trajtojnë veçse një trup të vetëm ‑ ashtu edhe Krishti. ¹³ Vërtet, në një të vetmin Shpirt Shenjt të gjithë jemi pagëzuar për të qenë një trup i vetëm, si hebrenjtë ashtu grekët, si robërit ashtu edhe të lirët dhe të gjithë e kemi shuar etjen në të njëjtin Shpirt Shenjt.

¹⁴ E trupi nuk është prej një gjymtyre, por prej shumë gjymtyrësh. ¹⁵ Po bëri e tha këmba: “Pasi nuk jam dorë ‑ nuk jam pjesë e trupit” ‑ a thua njëmend nuk do të jetë pjesë e trupit? ¹⁶ Po bëri e tha veshi: “Pasi nuk jam sy ‑ nuk jam pjesë e trupit” ‑ a thua njëmend nuk do të jetë pjesë e trupit? ¹⁷ Po të ishte krejt trupi sy ku do të ishte dëgjimi? Po të ishte krejt vesh ku do të ishte shqisa e të nuhaturit? ¹⁸ Porse Hyji kështu i ka caktuar gjymtyrët, secilën në trup sikurse ka dashur. ¹⁹ Po të ishin të gjitha një gjymtyrë e vetme, ku do të ishte trupi? ²⁰ Kështu pra, shumë gjymtyrë, por vetëm një trup. ²¹ Syri nuk mund t’i thotë dorës: “S’kam nevojë për ty”, ose koka këmbëve: “S’kam nevojë për ju!” ²² Madje, ato gjymtyrë të trupit që duket se janë më të ligshta, janë më të nevojshme, ²³ dhe ato që ne i mbajmë për më pak bujare, pikërisht atyre u bëjmë më shumë nderim. Dhe, sa më të marrshme janë, aq më njerëzishëm sillemi me to, ²⁴ e të njerëzishmet nuk e kanë këtë nevojë. Por Hyji ashtu e ka përbërë trupin, sa që gjymtyrës së fundit i ka dhënë më shumë nder, ²⁵ që të mos ketë përçarje në trup, por që gjymtyrët njësoj të kujdesen njëra për tjetrën. ²⁶ Dhe, nëse vuan një gjymtyrë, vuajnë së bashku të gjitha gjymtyrët; e nëse nderohet një gjymtyrë, të gjitha gjymtyrët gëzohen bashkë me të.

²⁷ Tashti, ju jeni trupi i Krishtit dhe, secili prej jush gjymtyrë e tij.

²⁸ Kështu Hyji disa në Kishë i caktoi: më parë apostujt, së dyti profetët, së treti mësuesit; pastaj vjen dhurata e mrekullive, pastaj ajo e shërimeve, e kujdesimit, e drejtimit shpirtëror, dhurata e gjuhëve të ndryshme. ²⁹ A thua të gjithë janë apostuj? Të gjithë profetë? Të gjithë mësues? A thua të gjithë bëjnë mrekulli? ³⁰ A thua të gjithë e kanë dhuratën e shërimeve? A thua të gjithë flasin gjuhët? Të gjithë shpjegojnë?

Dëshironi dhuratat më të shkëlqyeshme!

Dashuria

Dhe ja, po ju dëftoj më të shkëlqyshmen udhë!

Kapitujt