Kapitujt

Romakëve: 6. Të vdesim për kah mëkati që të jetojmë me Krishtin

¹ Çka, pra, të themi? Të jetojmë në mëkat, që të shumëzohet hiri? ² Prite Zot! Pasi vdiqëm për kah mëkati, si atëherë të jetojmë në të? ³ Po a nuk e dini se të gjithë sa jemi pagëzuar në Jezu Krishtin, jemi pagëzuar në vdekjen e tij? ⁴ Me anë të pagëzimit, pra, bashkë me Të jemi varrosur në vdekje që, sikurse Krishti u ngjall në lavdinë e Atit prej të vdekurve, po ashtu edhe ne të jetojmë në jetën e re.

⁵ Pra, pasi jemi krejtësisht të bashkuar me Të, me një vdekje të ngjashme me të tijën, me siguri do të bëhemi plotësisht një me Të me përngjasimin e ngjalljes së Tij. ⁶ Le ta kemi parasysh këtë gjë: njeriu ynë i vjetër është kryqëzuar bashkë me Të që të shkatërrohet ky trup i mëkatit, kështu që të mos i robërojmë më mëkatit , ⁷ sepse i vdekuri është i lirë nga mëkati.

⁸ E në qoftë se vdiqëm bashkë me Krishtin, besojmë se edhe do të jetojmë bashkë me Të, ⁹ pasi e dimë se Krishti i ngjallur nga të vdekurit, nuk vdes më: vdekja nuk ka më pushtet mbi Të. ¹⁰ Vdekja e tij qe vdekje njëherë e përgjithmonë për mëkatin, kurse jeta e Tij është jetë për Hyjin. ¹¹ Po kështu edhe ju: mbajeni veten [se jeni] të vdekur për kah mëkati, e të gjallë për Hyjin në Jezu Krishtin!

¹² Pra, mëkati të mos mbretërojë më në trupin tuaj të vdekshëm që t’u bindeni prirjeve të tij. ¹³ As mos i vini gjymtyrët tuaja në shërbim të mëkatit si vegla padrejtësie, por vëreni veten në shërbim të Hyjit porsi të gjallë, të kthyer nga të vdekurit dhe gjymtyrët tuaja bëjini vegla drejtësie për Hyjin, ¹⁴ sepse mëkati s’do të zotërojë më me ju, pasi nuk jeni nën Ligj, por nën ndikimin e hirit.

T’i shërbejmë drejtësisë

¹⁵ Çka atëherë? Të mëkatojmë pasi nuk jemi nën Ligj, por nën hir? Prite Zot! ¹⁶ Pse, a nuk e dini: në qoftë se e vini veten në shërbim të dikujt për ta dëgjuar si skllevër, se jeni skllevër të atij që e dëgjoni: qoftë mëkatit ‑ për vdekje; qoftë dëgjesës ‑ për drejtësi? ¹⁷ Por, faleminderit Hyjit: ju, që më parë qetë robër të mëkatit, tani iu bindët me gjithë zemër rregullës së mësimit që ju qe dhënë. ¹⁸ Pra, të liruar nga mëkati, u bëtë tani shërbëtorët e drejtësisë.

¹⁹ Po flas në mënyrë njerëzore për arsye të natyrës suaj të ligshtë njerëzore: sikurse dikur i vinit gjymtyrët tuaja në shërbim të fëlligështisë e të çrregullimit, që ju çonte në kryengritje kundër Hyjit ‑ ashtu tani vëreni në shërbim të drejtësisë që të shenjtëroheni. ²⁰ Në të vërtetë, kur ishit robër të mëkatit, ishit të “lirë” nga drejtësia. ²¹ E ç’të mirë kishit atëherë? Tani turpëroheni për atë gjendje, sepse fundi i saj është ‑ vdekja. ²² Tani, pasi jeni të liruar nga mëkati e u bëtë shërbëtorët e Hyjit, jepni fryte që ju çojnë në shenjtërim, e si rrjedhim është ‑ jeta e pasosur. ²³ Pra, paga e mëkatit është vdekja, ndërsa jeta e pasosur është dhuratë e Hyjit, në Jezu Krishtin, Zotin tonë.

Kapitujt