Kapitujt

Gjoni: 10. Shëmbëlltyra e Bariut të mirë

10

¹ “Për të vërtetë, për të vërtetë, po ju them: ai që në vathë të deleve nuk hyn nëpër derë, por tjetërkah kërcen brenda, ai është vjedhës dhe cub. ² Ai që hyn nëpër derë, ai është bariu i deleve. ³ Atij derëtari i çel derën e delet e dëgjojnë zërin e tij. Ai i thërret delet e veta me emër dhe u prin përjashta. ⁴ E kur i qet përjashta të gjitha delet e veta, u prin dhe delet i shkojnë pas, sepse e njohin zërin e tij. ⁵ Pas të huajit nuk do të shkojnë me siguri, por do të ikin, sepse nuk e njohin zërin e të huajit.”

⁶ Jezusi u tregoi këtë shëmbëlltyrë, por ata nuk e morën vesh ç’deshi t’u thotë me të.

Jezusi Bariu i mirë

⁷ Prandaj Jezusi u tha përsëri:

“Përnjëmend, përnjëmend po ju them:

unë jam dera e deleve.

⁸ Të gjithë ata që erdhën (para meje)

janë vjedhës dhe cuba;

porse delet nuk i dëgjuan.

⁹ Unë jam dera:

kush hyn nëpër mua, do të shëlbohet:

do të hyjë e do të dalë

dhe do të gjejë kullosë.

¹⁰ Vjedhësi s’vjen për tjetër, por për të  vjedhur,

për të prerë e për të bërë dëm.

Unë erdha

që delet ta kenë jetën

e ta kenë me plotësi.

¹¹ Unë jam Bariu i mirë.

Bariu i mirë e jep jetën e vet për delet.

¹² Rrogëtari ‑ që s’është bari,

të cilit nuk i përkasin delet ‑

kur sheh se po vjen ujku

lë delet e ikën

‑ e ujku i rrëmben dhe i shpërndan:

¹³ është rrogëtar

dhe nuk shkqetësohet për delet.

¹⁴ Unë jam Bariu i mirë:

i njoh të miat

dhe ato më njohin mua.

¹⁵ Sikurse Ati më njeh mua

dhe unë e njoh Atin

edhe jetën e jap për delet.

¹⁶ Kam edhe të tjera dele,

që nuk janë të kësaj vathe.

Edhe ato më duhet t’i bashkoj

dhe do ta dëgjojnë zërin tim,

do të bëhet një grigjë e vetme

e një Bari i vetëm.

¹⁷ Prandaj edhe më do Ati,

sepse e jap jetën time

që ta marr përsëri.

¹⁸ Askush nuk mund të ma marrë:

por unë e jap prej vetes.

Kam pushtet ta jap jetën

e kam pushtet ta kthej prapë atë.

Këtë urdhër e mora prej Atit tim.”

¹⁹ Këto fjalë shkaktuan përsëri përçarje ndërmjet judenjve. ²⁰ Shumë prej tyre thoshin:

“Ka djallin në trup! Flet marrëzira! Pse ia vini veshin?!”

²¹ Të tjerë thoshin:

“S’janë këto fjalë të një të djallosuri! A thua djalli mund t’ua çelë sytë të verbërve?”

Judenjtë e përbuzin Jezusin

²² Në Jerusalem po festohej e kremtja e Kushtimit të Tempullit. Ishte dimër. ²³ Jezusi ecte në Treme të Salomonit në Tempull. ²⁴ Judenjtë e rrethuan dhe i thanë:

“Deri kur do të na mbash pezull? Nëse je Mesia, na e thuaj haptas!”

²⁵ Jezusi iu përgjigj:

“Ju thashë e ju nuk më besoni.

Veprat që unë bëj në Emër të Atit tim,

ato bëjnë dëshmi për mua.

²⁶ Por ju nuk besoni,

sepse nuk jeni prej deleve të mia.

²⁷ Delet e mia e dëgjojnë zërin tim;

unë i njoh dhe ato vijnë pas meje.

²⁸ Unë u jap jetën e pasosur,

kurrë nuk do të sharrojnë:

askush nuk do t’i rrëmbejë prej dorës sime.

²⁹ Ati im që m’i dha,

është më i madh se të gjithë

dhe askush s’mund t’i rrëmbejë

nga dora e Atit.

³⁰ Unë dhe Ati jemi një.”

³¹ Judenjtë rishtas kapën gurë për ta vrarë. ³² Jezusi iu përgjigj:

“Ju tregova shumë vepra të mira të Atit tim. Për cilën ndër to doni të më vritni me gurë?”

³³ Judenjtë iu përgjigjën:

“Nuk duam të të vrasim me gurë për shkak të ndonjë vepre të mirë, por për shkak të blasfemisë: pse ti, duke qenë njeri, e bën veten Hyj!”

³⁴ Jezusi iu përgjigj:

“A nuk shkruan në Ligjin tuaj:

‘Unë thashë: hyjni jeni?’

³⁵ Nëse i quajti hyjni ata,

të cilëve u qe drejtur fjala e Hyjit

‑ e Shkrimi i shenjtë nuk mund të zhbëhet ‑

³⁶ si atëherë ju, atij që Ati e shuguroi

dhe e dërgoi në botë,

mund t’i thoni: ‘Po blasfemon’

pse thashë: Jam Biri i Hyjit?

³⁷ Nëse nuk i bëj veprat e Atit tim,

mos më besoni.

³⁸ Por nëse i bëj,

po edhe nëse nuk më besoni mua,

besojuni veprave,

që ta merrni vesh e ta kuptoni

se Ati është në mua

dhe unë në Atin.”

³⁹ Prapë deshën ta kapin, por u doli prej duarve.

⁴⁰ Jezusi doli prapë matanë Jordanit, në atë vend ku më parë Gjoni pagëzonte dhe zuri vend atje. ⁴¹ Shumë erdhën tek ai dhe thoshin: “Gjoni, njëmend, nuk bëri asnjë mrekulli, por, gjithçka tha për këtë njeri, u vërtetua.” ⁴² Atje besuan shumë në të.

Kapitujt